Praška vulica
digg del.icio.us TOP
  Posted November 4th, 2014 by Zdenko  in Purgerska Nostalgija | Jos nema komentara

Purgerska nostalgija

Sastavio: Mario Cicigoj-Družinec

VSI TI CAJTI KAJ SU PREŠLI! PRAŠKA VULICA… BUFFET TRST I ONI DRUGI V TI VULICI.
Praška je vulica v samom središču grada… ide od Trgača do Zrinjefca, a dobila je ime po onem Češkom gradu Pragu. Neznam zakaj, al je tak. Se prvo zvala, gda su se začele gradit hiže i palače prema Zrinjefcu… vulica Marije Valerije… je ta bila nekakšna princeza od Habzburgovaca. Su v toj novoj vulici hiže delali poznati plemenitaši al bogati građani: Pavle Hatz, Dragutin Vranyczany, conte Barattia… pl. Ožegović, pa neki Šipuši i Hohnjeci… bogataši i razni Židovi. Je kasnejše i glavna trajvanska štreka išla čez Prašku i još denes ide…

praska_ulica

Kak sam več rekel.. je bila ta brtija na samom vuglu Praške i Zrinjefca. Je otprta negde posle drugog rata. Je to bilo državno poduzeče kaj se bavilo ugostitelstvom. Bil je to zapraf obični pajzl kak i večina sličnih brtija v gradu. Je imel visoki šank da si se lahko mogel nalaktiti i si glavu pridržati gda ti postane težka. Je bilo par stolof v drugoj prostoriji gde si mogel sesti ak si imel društvo… al si štel nekaj pojesti. A za pojesti su bila samo kuhana jajca, čvarki, pereci….

Dakle… vu to vreme gda ja počnem govorit o tem Trstu, se još točilo vino z bačvih kaj su bile pošlihtane v podrumu. Bil je oni sifon z sodom pak su se pili špriceri, a pivi je bilo v flašama… črlenim al zelenim.

Je brtija bila smrdliva kaj su nutar fort čikali, a se ni luftalo… a se i vsaki dan negdo pobluval po podu. A nekad bi se i spišal… onak… čez hlače. Je… je… takšna je bila tam elita zastuplena. Zapraf… fort su bili isti, bumo rekli… gosti v tem pajzlinu.

No, kaj bi mogel nastavit o tem Trstu vam moram nekaj povedat o Praški vulici, a je zvezano z Trstom. Je v Praškoj vulici bil jen štacun… oni Posrednik. Se je v njem prodavalo vrednih stvari kak su zlatni i srebrni šmuk… vure vsih fela, vredni bešteki, dragulji, biseri… Vse je to bila največ polovna roba kaj bi je građani donesli na prodaju. Pa če se kaj proda je ti Posrednik uzimal proviziju. A je v tem štacunu bilo sva sila te robe… je bil nafilan kak filana paprika. Kaj je to bil jedini takvi štacun v Zagrebu i još na široko dalše. I se znalo, gdo nema penez za kupiti nekaj noveg nakita, vure… al kakšnu drugu vrednotu je to išel iskati v Posrednik.

DSC_2589

Je ti Posrednik bilo takaj državno poduzeće. Su imeli i druge vrste štacuna… kaj se prodavala obleka… je taj bil v Petrinjskoj vulici broj 4, a oni z meblima je bil v Vlaškoj, pak tehnička roba v Jurišićevi… A je taj Posrednik dalko stareši. Još za Kraljevine je to bil posel jenog Židova… se vse zvalo Staretinar – kupovina – prodaja – zalagaonica. Pa je to posle rata nacionalizirano… se veli… postalo društveno vlasništvo.

A je v to vreme bilo fest naroda kaj su šteli kupiti nekaj jeftinejše… polovno, a još več je bilo onih kaj su šteli nekaj svojeg prodati, kaj bi bolše mogli živet. Pa je tak Praška vulica postala poznata v celi državi… radi teg Posrednika.

Je Posrednik imal dva velka izloga, kaj su v njih za dana nametali svu silu te vredne robe, a bi po noči to zvadili kaj nebi negdo izloga razbil i oplačkal. Pa gdo je god nekaj štel tam prodati je tražil da se to dene v izlog. Je to bilo važno… jer nisi tam dobil peneze gda si to donesel na prodaju… neg si moral čekati da se to proda… Su neke vrednote tam stajale dugo vremena, pa i nekolko leta, a da ih nigdo ne kupi.

I tak, je to mesto na vulici spredi Posrednika bilo navek puno da si jedva mogel proč. Su se tu zadržavali oni kaj su se zvali… šverceri. Al su prodavali… al su kupovali…

DSC_2591

Ovak… človek nutar donese nekaj na prodaju, mu to službenik proceni, al dene tvoju cenu na to. A oni švercer vani te halta… i ti ponudi svoju cenu za to… kaj je bila dost spodi tvoje želje. I narafski… ne buš na tak nekaj pristal. I bi došel za koje vreme pitat jel to tvoje prodano. Ni. A oni švercer vani bi te strplivo snubil i dalše. Na kraju cele priče je ipak taj švercer došel do tega za sitne peneze, jer bi človeku kaj prodaje trebali nofci.

A su na vulici stajali i oni kaj su nudili na prodaju, največ vure vsih fela… pa zlato, lančeke, prstenje…. Je puno ljudi tuda prolazilo kaj se negda največ njih v Zagreb dopelalo z cugom. Pa je skoro vsaki čez Tomislavac i Zrinjevac došel v Prašku i na Trgač. Tak su šverceri snubili prolaznike da kupiju vuru, al nekaj drugo.

z19004

I je dobro išel posel. Su pri šverceru vure bile fest jeftinejše neg v štacunu, al tem Posredniku je to išlo tak, tak… te pita ti švercer dal trebaš vuru, su rekli i čuka. Pa ak trebaš te otpelal v Trst gde je sedel glavni švercer kaj je pri sebi imal vure. I je taj zvadil z žepa par vura da si moreš zabrat. Je imel največma oni Darwill, Omega, Doxa, Omikron, Areta, Zenit… Je ti Darwill i Omega su bili najskuplejši, a oni drugi jeftinejši… a je najmanše vredela ta Areta. I bi si ti zabral, platil glavnom… bi te još zažicali da platiš rundu za šankom, kakti si dobro prešel jer ti je glavni dal velki popust… I ti bi sav sretan prešel z novom vurom na ruki…

Praf za praf, vse te vure su bile jeno te isto… sam su drugač zgledale. Su se te vure v djelovima švercale prek granice z Italije, al Istambula gde su bile fabrike. Tu pri nam v Zagrebu je bila ilegalna tvornica za montiranje tih vura… tam v jeni hiži v Dubravi. Je tam denes velki i poznati zlatar.

A glavno skladište zgotovlenih vura je bilo v Boškovičevi vulici na broju 20. Tam je sedel velki šef… su rekli Boss.

z16017

I tak je postajala ta švercerska hijerarhija… Glavni Boss je robu daval onem glavnom šverceru kaj je sedel v Trstu, a oni šverceri vani na vulici bi imeli samo jenu vuru na ruki kaj bi je pokazivali kupcu. Su ti vani bili samo, kak bi se reklo denes… Terenski komercijalisti… Vsi skup su dobro zarađivali…

Vse vure kaj su sklapane iz delof su nutar v… se veli kučištu imale istog stroja. Oneg najjeftinejše Arete, pak su se samo metale ciferplate… su to brojčaniki raličitih fela marki vura. I kaj si god kupil… bil je jen te isti drek… za veču al manjšu cjenu. Bi to človek kaj je kupil saznal tek gda bi vuru odnesel pravem vurmaheru na popravak…

Tak se i zlato prodavalo v Praškoj. Največma zaručničko, al vjenčano prstenje, te lančeki za krstitke… kaj je negda bilo obvezatno. Ti je švercer ponudil… bumo rekli… zlatni lanček, kaj ga je imel oko svog vrata, pa ak si bil zainteresiran te otpel pak onem glavnom v Trst i ti je taj prodal kaj je z žepa zvekel.kakti original v škatuli.

Ali je oni glavni dobro procenil kolko ti moreš poznati kaj je zlato, a kaj ni. Pa ak je zaklučil da si bedak ti je podvalil lažno zlato, a naplatil pravo. Tak i prstenje. Makar su lažni prsteni bili retkost pri švercerima, jer ni mogel imeti vse veličine. Al su zato lančeki skoro vsi prešli lažni. Je bilo onih retkih kupcof kaj su šteli proveriti jel to pravo zlato. Pa ni bilo problema… te jen od vanjskih švercera otpelal kod zlatara, tam v Gajevu i je zlataru dal svoj lanček na proveru. Je zlatar potvrdil da je zlatni… kaj je i bilo, a kupcu je posle glavni dal original v kutiji, kaj je bil zapraf lažnjak. Kak god si okrenul, su te ispredelali…

Taj glavni kaj je sedel v Trstu je v vsako godišnje doba imel na sebi balonera z puno dubokih žepova, a je i nosil z sebom kožnatu torbu kakšnu imaju doktori. Je sedel v birtiji mam pri ulazu v šekret, kaj se štengama išlo v podrum. Ak bi bila kakšna opasnost bi se spustil v taj šekret, pa je čez zadnja vrata zbrisal v podrum i čez haustor van na vulicu. Jeno vreme su ti glavni, kaj su se takaj menjali, imali dogovora z nekim stanarima v moji hiži kaj bi im oni čuvali robu v stanu. Jemput gda je milicija delela raciju v Praškoj vulici i v Trstu, je ti glavni dobežal gor k meni na vrata lupat i ja sam ga pustil nutar dok ni prešla racija. Bi im kod racije zeli vsu robu kaj su imeli pri sebi.

z19021

A ja sam poznal skoro vse te švercere, pa su bili godinama moji susedi.Tak je ta brtija Trst bila glavna švercerska poslovnica v Zagrebu. Gda bi se navčer brtija zaprla su čez moj podrum dolazili v onu drugu prostoriju kockari, kaj su celu noč kartali za nofce. Su se u ono vreme izlogi brtije zapirali z onim plehnatim roletama i se ni vidlo svetlo van na vulicu. Su se znali kartati vse do jutra, a su konobarici dobro platili kaj je ostala celu noć.

Su se kasnejše v Trst preselile i one kurve kaj su ordinirale pod Zidom, kaj su im tam zaprli brtiju… oni Dalmatinski podrum. Pa je Trst tak bil kompletan, kaj si god trebal mogel si to v Trstu dobit al saznat informaciju. Ja bi v Trst navrnul vsaki dan popričat z tim šarenim društvom, a sam i ja znal kojem papku prodat kakšnu vuru… kaj sam ju mogel tu dobit na veresiju.

DSC_2590

I onda su se jenog dana v Trstu pograbili oni makroi. Su to poslodavci kurvama… pa su se zpikali z nožima… je jen bil mrtaf. Je ležal na onem kamenom podu i saf bil krvavi… sam videl to. I su Trsta zaprli na skoro dva leta. Potem su ga preuredili u moderni kafič…

Iz Praške su oterali švercere. Oni Posrednik je još do pred kratko vreme delal, sam videl da prerihtavaju štacun… neznam jel opet otprt… jednostavno pozabim pogledat.

…………. Je, je otprt je… lepo vređen. Pak prodaju nutar vure… piše, Darvel… Denes Trsta više ni. Su ga zaprli prije petnaest i više let kaj je celo to poduzeće propalo. Na tem mestu su bile razne druge, se veli djelatnosti. Zajdni je bil oni Sity expres. Zdaj je zaprto, prazno… i tak to… sam se malo setil tega.

A su tu v Praškoj vulici bile razne obrtničke radione i štacuni, a po dvorištah i cele male fabrike. Je na početku, tam od Zrinjefca bila trafika, kaj si mogel kupit vsega kaj postoji od duhana… cigaretline vsih fela, rezanog al droblenog duhana, pa one črne kockice trdeg duhana za žvakanje. Sam jemput probal pa sam se zbluval kak živina… kaj sam gutal te hračke mesto da sam pluval.

A kak sam ja bil najmlajši v moji klapi na Zrinjefcu, su fort mene pošilali da idem kupit jeneg, dva al tri cigaretlina. A su tak na komade kupovali oni kaj nisu imali penez za celu škatulu… al oni kaj im se ni štelo to nosit v žepu. Je tak bilo po vsim trafikami v gradu. I je dalše od trafike bil oni poznati, do denes je tam, štacun Kraš. Negda je pisalo samo Bonbonjera, a kasnejše je dobila i ime. To je bilo pravo. Se takaj tu prodavalo na komade al na vagu, pa i poprek.

Su bile velke škatule al staklenke pune bonbonof vsih fela, pa si mogel kupiti i jenu kilu ali i pet deka. Si mogel dati pet dinara i tražit da ti za to daju nekaj. Pa gda još nismo mi klinci začeli čikat, smo v tem Krašu trošili sitniše. Pa je tam dalše bil štacun kaj su se prodavala dječja kolica, ona za male bebe i vse potrepštine za to. Se zvalo Podmladak. Je bilo kolicof od pletene vrbe pa do onih tapeciranih z kotačima kaj su se pumpali. Je kasnejše to preuzelo ono poznato poduzeće Jadran kaj je nema tomu dugo… propalo.

Je tu bila i fest poznata krznarija. Je štacun bil z vulice, a v dvorišču je bil šnajderaj tega, pa skladište krzna. Su tu dolazile nobles ženske kaj su si mogle priuštit te skupe kapute i bunde. Se gazdarica falila da šiva bunde za celi… se to zvalo… centralni komitet. Narafski za ženske… Se vlasnica zvala Doboš Elza i je bila jena od mojih suseda v hiži na Zrinjefcu. Je bila bogata baba puna zlata na sebi. Nam je redovito davala za bonbon, a mi bi joj vikali… ljubim ruke teta.

z19028

Je do tega bil i denes je oni najpoznatejši frizerski salon v Zagrebu… Kincl. No, tu su dolazili… bi rekli… krema Zagrebačka. Mislim samo ženske, dame, gospođe i drugarice. Bi tu došla kakšna dama, pa bi je dve frizerke po glavi trajbale, pa je sa strane manikerka nokte na rukami rašpala. Je taj salon još od Kraljevine tu na istom mestu. Je tu i bil oni Posrednik kaj sam gor pisal, pa onda Štambilj. Je to bila radiona kaj su se delali štambilji od drveta, gume, mesinga… pa ak je gdo štel bi i od zlata naredili. I denes je taj tu… se zove Pečat. Kakti je to po horvacki… I je onda bil štacun i proizvodnja ženskih čarapa z natom, bez nata… z velkim al malim očicama, na pantljiku… al gumu. Pa su se i halteri delali po mjeri… kaj su držali te čarape na nogama. Pa je bil i neki štacun kaj su se proizvodila radna odjela… kute i razna zaštitna oprema za radnike i onda dolazi jen od najprvih modnih butika v našem Zagrebu… je pisala velka tabla ŠIK. Se tu prodavala gotova ženska roba, al posebne kvalitete i …se reče dizajna… I onda dojde oni Maričef prolaz… o tem bum jemput nekaj napisal…

DSC_2588

Pa za tim ide štacun… pafumerija… kaj se prodaju fini mirisi i šminke. Kasnejše su još dodali kvalitetnu bižuteriju. I je sad na redu velki zapraf dugački štacun, kaj je prodaval štofove… se još veli tkanine, na malo i velko. Su nutar bile poslagane velke bale teg štofa kaj se dovažal z celog sveta. Su tu kupovali građani, al največ šnajderi. Je dalše ona sad več propala Mladost, knjižara i papirnica. Su denes tam nekakšni ostatki tega, kaj prodajeju uredsku opremu. Ti je onda tu bil i štacun kaj ga je držal jen Taljan… se ne sečam kak se zval… je tu prodaval kožnatu galateriju: ženske torbice, muške taške, remenje, rukavice, kape i škrlake. Vse od prave i fino obrađene kože. Je tu bila fest skupa roba… se pričalo da je to uvoz z Italije, Njemačke i Francuske.

DSC_6840

Pak je onda još v Praškoj bilo dales zlatarnica, kasnejše ono Celje, pa su bila dva fotografa… Je bila i galerija umetničkih slika. Su se tu delale… kak veliju aukcije al dražbe. Posle je to pretvoreno v LIKUM, pa onda v ULUH. Denes je ULPUH… bi ga vrag znal kaj im je vse to. No su i dalše izložbe. I na kraju pri samom Trgaču je bil Singer, još dugo let posle drugog rata. Su se prodavali šivači stroji, pa štrikače mašine. Posle su dodali i ostale kučanske aparatline, pa vse do denes menjaju djelatnosti v tem prostoru. A negda davno su se v tem, velkom štacunu prodavali avtomobili… oneg Tadije Bartoloviča, kaj je prvi v Zagreb dopelal avtomobil za taxi. Pa su i na vrhu Praške stajali taksiji vse do sedamdesetih let, gda su ih premestili v Bakačevu.

Je to kaj sam opisal ona zapadna strana Praške vulice. Z druge strane je do pol vulice velka palača kaj je od navek bila banka, pa osiguravajuče društvo… poznata Croatia. Je onda negda bila ta židofska sinagoga, kaj su je zrušili i na njeno mesto zgradili Robnu hižu, kaj je zgorela tam sedamdesetih. Je od onda velko parkiralište… kaj ga držiju židovi, jer im je vračena ta parcela I na kraju, je spet moja hiža… kaj sam več opisal.

Je v Praškoj vulici bilo i više vsega… štacuna, radiona, malih fabrika. Su bili po dvorištah i v dvorištnim hižama, kaj se z vulice ni vidlo. Su bile samo table kaj su davale obavjesti, al su po haustorima bili mali stakleni ormareki izlogi.

Praška vulica se mogla glatko meriti z Ilicom. Je bila prava velegradska vulica. Denes je tu vsega i svačega, a največ je poslovni dio… se reče.

Je meni Praška vulica navek bila draga, makar v njoj nisu več oni kaj su negda bili. Ali sam ja tom vulicom vsaki dan išel v školu, kasnejše na posel i vsi su se ljudi z te vulice znali i pozdravlali. I denes rado i često projdem čez nju i se setim starih cajtof kaj su prešli…

z19019

Vas poštivlem i pozdravlam.
Da ste mi gesund !
Mario Cicigoj-Družinec (Mekon) iz Zagreba Grada

Serbus i najte kaj zameriti.

Follow Zdenko’s Corner on Facebook !

Share



Tags: ,



Imate komentar?
Ako imate svoj komentar ili svoje mišljenje koje želite podijeliti, pošaljite mi email ili ispunite dolje predviđena polja za vaš komentar. Svi komentari će biti prethodno pregledani, ispravljeni da budu korektni, pa će tek onda biti objavljeni.

Pošaljite svoje vlastite opise putovanja sa ili bez bicikla, izvještaj sa neke utrke ili možda članak iz povijesti Zagreba ili biciklizma u Hrvatskoj. Na ovim stranicama već imam više od 400 priča i biti će mi drago objaviti sve vaše priče, koje zadovoljavaju kriterije, po pitanju tema na ovome blogu. Pretraživanje ovih stranica omogučeno je na vrhu glavne stranice bloga sa desne strane. Isto tako na vrhu svake stranice nalazi se opcija za prevođenje ovih stranica na druge jezike.

Pošaljite svoje komentare na email adresu: zdenko@zkahlina.ca

Leave a Reply