Po Novi Vesi gor i dol
digg del.icio.us TOP
  Posted May 12th, 2017 by Zdenko  in Purgerska Nostalgija | Jos nema komentara

Purgerska nostalgija

Preneseno sa Lupus Portala

VSI TI CAJTI KAJ SU PREŠLI! PO NOVI VESI GOR I DOL…
Ti je ta vulica Nova Ves… stara je kak i Zagreb. Se spomina v čituljama još od 1330. Leta makar je puno starša. Je tu negda davno bila samo crkva sv.Ivana Krstitelja, pak neki tvrdiju da su teru cerkvu zazidali oni Vitezi Templari.

Pa ni važno, su tam v tem naselju živeli Purgari, kaj su bili zmedi Griča i Kaptola. Se veli… nit vrit nit mimo. Je to onda bilo kakti naselje obrtnikof vsih fela i se zvalo Lepa Ves. Pa gda se počela formirati kakti vulica je dobila ime Nova Ves. Su se tu dotepali razni zanatlije, pa su tu i Kaptolski popi imeli svoje …se reče Kurije.

z17080Viš..tu prestane Kaptol

Su to hiže kaj su v njima živeli oni popi kaj su se brinuli za Katedralu. Su te hiže tu i den denes, su ih lepo obnovili i vsaka ima svoje ime, pa su se stanovniki, po ugledu na Gričane… prozvali Novoveškim Purgerima. A sem teg imena nisu ništ imeli z starim gradom na Griču. Su poreza plačali Kaptolu, kaj im je ti isti zapretil da bu ih izbacil z cirkve van.

Pa se grad razvijal i širil, je tak i Nova Ves postala jena od glavnih vulica kaj ide od Kaptola po hrptu brežuljka, vse do Zvezde. Veliju Gupčeva Zvezda, makar nema niš z onim Gupcem kaj je bune delal i puntal seljake proti Zagrepčancof. Baš si je sakaj zmislil… ta seljačina.

Pak je ta vulica Nova Ves do denes ostala jako slična kak je bila negda. Ima i dost hiža kaj su stare po par stotin let, a je i nekaj noveg izgrađeno… al obnovleno. Praf za praf nis već dost dugo prešel celu vulicu, pa sam se lepo iznenadil gda sam videl da je puno obnovlenih hiža, fasada, krovova. V celoj vulici su samo tri – četiri nove moderne hiže, pak nisu baš pokvarili izgleda onoj starini okol. Pa gda sem več moral iti v Novu Ves, sam odlučil celu sprehajbati. Sam išel jenom svom pajdašu, kaj je fest poznati filmski režiser… pisac… povjestničar i velki domoljub… oni Pavle Vranjican. Sam mu imal nekaj za izporučiti osobnoga.

I tak sam išel od raneg jutra lepo, polahko i gledel levo i desno. Sam tak sprešel celu i gor i dol. Si morete zamislit kak sam se zašvical. Gda sam se vrnul dol mam sam zašel tam na Opatovinu… se zna… na Ožujsko z citronom. Ali pemo po redu…

z17079…a tu začne Nova Ves

Viš ti je ta jedna bivša Kurija, su je čak nadozidali i denes je to fini, se reče… ekskluzivni restoran… Se zove Baltazar… Melkior… Gašpar… Je to tak po onim Tri Kralja z Biblije. Je vlasnik tega nekakšna obitel Petrović. Oni imeju takšne luksuzne restorane i vile za turiste po celoj Istri. Pa tu v ovu na Novi Vesi dolazi sama visoka klijentela… onak se naruči mesto. A ima i gor na katu i sobe, onak… se veli za odmor… se razme kaj sam štel reč.

z17072

Taj je del Nove Vesi fest star. Su na tem delu one Kurije… popovske hiže. Su denes posvečene sveticama… Sveta Doroteja, Sveta Magdalena… i tak ih ima četri. Pa ih je bilo i več ali su završile v privatnom vlasništvu, pa denes nutar živiju obični ljudi… al su pak preuređene v poslovne prostore.

z17078

Pogleč, ta je hiža jena od najstareših v Novi Vesi… par stotin let… jeee… pa tak i zgledi. A je to vlasništvo popova z Kaptola. Bi šteli vragi jeni to zrušit i zidat novo. E pa nebuju… im neda Grad Zagreb. Je to starina kaj ju treba sačuvat, obnovit… Je v davna vremena ta hiža bila ubožnica, ali ne kakva god. Su tu nutar živeli stari popovi kaj već nisu mogli ništ koristiti Kaptolu. Viš su oni već onda imeli tu, se reče socijalu… Ali da baš nebi zabadaf kruha Kaptolskog jeli, je tu Kaptol otprl… je, je… knjižaru. Je to prva knjižara v Zagrebu, a posle nje još zadugo ni otprta ni jena, tam do oneg Ljudevta Gaja. Dakle je ta knjižara bila više kak biblioteka kaj su čuvali knjige neg kaj bi negdo ih kupoval. Su onda knjige još bile rukom pisane, a je najbliža tiskara bila v Nirnbergu al Beču. Pa su oni stari popi, gdo je mogel i imel zdravu pamet, te knjige prepisivali, al popravlal… keljil… i tak. Je ta knjižara tu imela… se veli… tradiciju do prije dvajset let, gda je pri kraju to bil antikvarijat starih i retkih libra.

Nova Ves kad je njome vozio tramvaj,1911-1931,linija Jelačićev trg-MirogojNova Ves kad je njome vozio tramvaj,1911-1931,linija Jelačićev trg-Mirogoj

Se sečam da je nutar delal nekakšni z bradom do pupka i je samo mumlal… kaj ga nigdo ni ništ razmel… je bil malo vudren. Gda je taj vmrl, a nis mogel saznati kak se zval… je vse te knjige dobila kak veliju… Sveučilištna biblioteka. A je ta hiža već davno bila prazna..je samo ta knjižara tu bila… Zdaj je ta hiža zaprta. Prokišnjava, je pohabana.

z17017z17015

A viš, te dve hiže… vekšu i majnšu… ti je to negda bil fest poznati restoran v Zagrebu. Se zval kak i vulica: NOVA VES. Su tu dolazili z cele Horvacke kušati domaču Purgersku huhinju, pa guštati praveg domačeg vina. Su tu rad zašli i ondašnji politikanti i obični Purgari. Sam i ja kak još fakin z svojom klapom tu znal zajti na gemišt, kaj smo do Zvjezde išli cipelcugom z Mihajlefca… Je nutar v restavraciji sviral jen fest stari muzikant… je imel one citre i je znal vse popevke z oveg sveta. Se taj zval Lojzek… Je lepo popeval i svral, ali su mu fort curele sline z gupca, a je imel ogromni nos… kaj ga je retko videt. Pa su se gosti znali i fest nasmijat gda bi ga samo pogledali. Je sviral za sitne peneze po željama gostiju. Posle sam ga jemput videl da je sviral v onem negdašnjem izletištu na Bijeničkoj cesti… tam pri Mirogoju.

Je ta brtija Nova Ves bila kakti ono slavno ugostitelsko poduzeće Splendid, kaj je propalo prije oveg zajdneg Domovinskog rata. Pa je jeno vreme bilo zaprto, pa su se onda zredali tu razni gostioničari. Denes je to velka sramota… kaj je tam Kineski restoran… ona ASIA… kaj je ima po celoj Horvackoj. Kak da mi nemamo svoje krčmare.

z17056

Gda je več Kaptol narasel i bil biskupski grad i je skup z Gričem postal naš dragi Zagreb Grad, je bilo tolko popova da ih nisu imeli kam devat. Pa je velko tih hiža na Novi Vesi postalo stanovanje za njih, se reklo Kurije. Tak da moremo reči da je vsaka druga hiža bila popovska… Pa je ona stara ubožnica več davno postala pretjesna za vse. I su onda Biskupi zgradili velku hižu… baroknu. I je ta postala svečenički dom za nemoćne pope, kaj su bili fest stari. Je ta krasna palača z velkim vrtom pozadi zgrađena 1781.leta. Je to jena od najlepših, se reče… kasno baroknih hiža v Zagrebu, kaj je ostala fest sačuvana i zvana i znutra. Ju je dal gradit oni Zagrebački Biskup Josip Galjuf, kaj denes i jena vulica… v Maksimiru, ima nejgovo ime. Je kasnejše tu hižu preuzela vojska… žandarmerija i su je pretvorili u vojnu bolnicu… pa onda v Kasarnu. Je tam pri kraju one črlene države ta hiža bila vojni sud i taki Haps… kažu zatvor. Zdaj… v novi državi je ta hiža obnovlena i je tu denes kulturna ustanova..se zove ATELIER ZAGREB FILM.

z17025

Pogleč, tu je ti lepi plot… pak ni plot, je to ograda… i ta hiža… tu je negdar bila mala fabrika. Zapraf je bila ljevaonica železa i gusa. Su se tu delale peči za kurenje drf pa vuglena. Su to bile fest poznate peči i pri nam i pri vanjskem svetu. Se reklo KRALJICA PEĆI… pa gdo to ni čul… Je taj posel vodil jen Purgar, ali je praf za praf bil Čeh… Židof. Se zval Jaromir, a ženica mu je bila tu domača Emica. Su oni taj posel delali još za one Kraljevine, pa za Ndhazije… i v oni črleni državi je tu delalo… gda je najbolše išlo i trideset radnikof. Se taj gus ljeval v kalupe i se onda sastavlal i oblagal z onim šamotom. Su te peči lepo zgledele kaj su imele puno ukrasa na sebi a su noge na kerim su stajale bile kak pasje… lavlje šape… je bilo i onih kak ima žaba. Su vse peči bile ofarbane v srebrno. Su to bile kvalitetne i dugovječne peči….

16_Nova_Ves

Je taj Čeh Jaromir došel v Zagreb dok je bil fest mlad, da bu tu študiral… pak je nekak završil kak pečarski šegrt. I mu ni nigdar bilo žal kaj ni postal fiškal… al doctor. Je ta familja dobro zarađivala, su bili bogati. A se pričalo da je ti Jaromir svoje radnike fest dobro plačal i daval dodatke onim kaj su imeli malu djecu. Pa bi im svaki teden daval i …se veli višak… stimulaciju, kaj bi još bolše delali. I gda su v ono vreme radniki štrajkali kaj su tražili svoja prava, nejgovi nigdar nisu šteli napustiti gazdu. Su se te peči tu delale onak… se veli… serijski, pak je gda je negdo to naručil se delalo i po želji. Su to naručivali bogataši i plemenitaši. Su te peći bile visoke oko jenog metra i nutar je bilo mesta za celu kantu vuglena… al par velkih kladic dreva. A one peći po naruđbi su bile i po dva tri metra visoke i ukrašene po želji… pa se na njih napisalo ime vlasnika… al inicijali. Su te vse peči bile fest teške, vse prek sto kil… pa do par stotin kil.

17_Nova_Ves

Je za one Ndhazije taj Čeh i dalše delal, makar je bil Židof… ga nisu dirali, kaj je bil majstor umjetnik. Je delal i za ondašnje politikante peči… A su se pri ti fabriki delali i razni ukrasi od teg ljevanog železa, za ograde i plote… pa kvake za vrata… i tak. Je onda došla ona črlena država… pa su več starem majstoru vse zeli… se veli nacionalizirali. Su mu zeli vse kalupe za ljevanje teg gusa i odnesli v onu fabriku Đuro Đaković v Slavoniji. I su tam nastavili ljevati te peči do prije dvajset let. Su se takaj zvale Kraljica Peći… Denes se več ne delaju…

Su stari majstor Jaromir i ženica vmrli tam negde v šezdesetim, kak siromaki. Kaj im ni ništ ostalo od vlasništva. Zapraf su im ostavili hižu i praznu fabriku na Novi Vesi i nekaj od zaliha gotovih peči. Ja se sečam tih starih ljudi, kaj je moja baka… plemenitašica… bila prijateljica z tom Emicom… kaj su negdar skup blazile po kavanama, a su se nastavile posječivat i do kraja života. Gda su vmrli je fabrika zrušena, je ostala samo hiža… kaj je posle dozidana. Ti starci nisu nigdar imeli djece, pa gda su vmrli je vse zela država. Denes je to lepo uređena hiža i dvorište, pa neznam gdo tu živi… je zaprto… nis mogel nutar.

A ja doma imam jenu peč kaj je ti majstor napravil mojoj pokojnoj baki. Zapraf ju držim za ukras v …se veli… vikendici… i još se v njoj more zakurit vatra. I tak je to jena vesela i žalostna pripovetke z Nove Vesi.

…pemo dalše…

z17064

To ti je velka bi se vidlo kak palace ali ni. Ti je to prva hiža kaj je tak zgrađena v Zagrebu… se denes veli DVOJNI OBJEKT. A Zagrepčanci su te hiže zvali: SIMETRIČNE KUĆE. Zapraf su to tri hiže kaj su spojene zajedničkim pročeljem. Su z dvorišta još dve hiže kaj vse skup zgledi kak slovo U. Je to tak projektiral oni poznati arhitekt z Beča, se zval BOLLE. Kiru god staru velku hižu, al palaču v Zagrebu vidiš kaj je ovak z ciglom zvana, ti je taj človek projektiral. Je taj Bolle valjda sanjal cigle. Je on projektiral i one Arkade na Mirogoju. Ova tu je zgrađena 1880. leta po naruđbi Gradskog Poglavarstva. Denes je nutar špilšuh… se veli dječji vrtić, pa nekakšne male škole za djecu… pa svakaj drugog. A tam z dvorišta stanuju građani. Je lepa to hiža..kaj ne?

z17046

Viš, ja pamtim tu Novu Ves celi život… od kak sam počel blaziti po mom dragom Zagrebu. Pa se ne sečam da je igdar v ti vulici bilo drveta. Je samo tam pri crkvi Sv. Ivana Krstitelja… drugač ništ… A denes je vse puno tog lepog drveća, kaj dela hlada… su to Agacije… veliju da su fest otporne na zagađenja i su pogodne baš za gradove. Je to da se dreva sadiju po gradu naredil oni gradonačelnik dotepenec Bandić. Pak je tak zasađeno i po Jurišićevi, Gajevoj i tak… Je lepo videt Novu Ves tak uređenu i se prošetat čez te stare hiže. A ima i dost kafičof… uhhh baš mi je denes nekak sparno. Bum si sel v hladovinu na jenu Ožujsku z citronom. Moram čekat oneg pajdaša Pavla Vranjicana… taj navek dugo spi vjutro!

18_Nova_Ves

I tak sam se malo setil te Nove Vesi, pak čez tu vulicu prolazi malo Zagrepčancof… samo oni kaj tu stanujeju… ni avtomobila nema preveč. Mirna i tiha vulica. Nit one turiste ne vodiju čez nju… a ima se kaj videt.

Bi ja mogel još puno pričat o ti vulici, mi je vse poznato iz starine. Sam i tu jemput imal nekakšnu pucicu… tam na vuglu Belostenčeve. Pa bi po kmici prešli čez Malu vulicu iza one kapelice Majke Božje Žalostne… dol v Medvedgradsku… v staru fabriku kože. Al nebum vas več štental z tim… sam vam ziher več dosadil.

Vas poštivlem i pozdravlam.
Da ste mi gesund !
Mario Cicigoj-Družinec (Mekon) iz Zagreba Grada

Serbus i najte kaj zameriti.

Follow Zdenko’s Corner on Facebook !

Share



Tags: ,



Imate komentar?
Ako imate svoj komentar ili svoje mišljenje koje želite podijeliti, pošaljite mi email ili ispunite dolje predviđena polja za vaš komentar. Svi komentari će biti prethodno pregledani, ispravljeni da budu korektni, pa će tek onda biti objavljeni.

Pošaljite svoje vlastite opise putovanja sa ili bez bicikla, izvještaj sa neke utrke ili možda članak iz povijesti Zagreba ili biciklizma u Hrvatskoj. Na ovim stranicama već imam više od 400 priča i biti će mi drago objaviti sve vaše priče, koje zadovoljavaju kriterije, po pitanju tema na ovome blogu. Pretraživanje ovih stranica omogučeno je na vrhu glavne stranice bloga sa desne strane. Isto tako na vrhu svake stranice nalazi se opcija za prevođenje ovih stranica na druge jezike.

Pošaljite svoje komentare na email adresu: zdenko@zkahlina.ca

Leave a Reply